सिंदेवाही पोलिसांचा स्तुत्य उपक्रम: गणेशोत्सवात जनजागृतीसाठी सार्वजनिक गणेश मंडळांसाठी आकर्षक स्पर्धा आणि रोख बक्षीस जाहीर!
सिंदेवाही:
आगामी गणेशोत्सव शांततेत, सुरक्षित आणि सामाजिक सलोख्याच्या वातावरणात जावा तसेच समाजात महत्त्वपूर्ण विषयांवर जनजागृती निर्माण व्हावी, यासाठी सिंदेवाही पोलीस दलार्फत एक विशेष उपक्रम राबविण्यात येत आहे. या अंतर्गत गणेशोत्सव जनजागृती, सुरक्षितता आणि समाजहितासाठी सार्वजनिक गणेश मंडळांसाठी ‘आकर्षक स्पर्धा’ आयोजित करण्यात आली आहे.
उद्देश आणि विषय:
उत्सवाचे पावित्र्य जपत सामाजिक भान वाढवणे, तरुण पिढीला योग्य दिशा देणे आणि सामाजिक बांधिलकीची भावना जोपासणे हा या उपक्रमाचा मुख्य उद्देश आहे. यंदाच्या गणेशोत्सवात प्रामुख्याने अमली पदार्थ विरोधी जनजागृती, ध्वनी प्रदूषण नियंत्रण आणि महिला सुरक्षा या संवेदनशील व महत्त्वाच्या विषयांवर उत्कृष्ट देखावे, जीवित झांकी किंवा जनजागृतीपर प्रबोधनात्मक कार्यक्रम सादर करणाऱ्या सार्वजनिक गणेश मंडळांना पोलीस दलातर्फे विशेष पुरस्कार देऊन सन्मानित केले जाणार आहे.
आकर्षक रोख बक्षिसे:
या स्पर्धेत उत्कृष्ट कामगिरी करणाऱ्या मंडळांसाठी सिंदेवाही पोलीस दलातर्फे आकर्षक रोख बक्षिसे जाहीर करण्यात आली आहेत:
प्रथम क्रमांक: ₹११,१११/- आणि मानचिन्ह
द्वितीय क्रमांक: ₹७,७७७/- आणि मानचिन्ह
तृतीय क्रमांक: ₹५,५५५/- आणि मानचिन्ह
तसेच, सहभागी सर्व गणेश मंडळांना सन्मानपत्र देऊन गौरविण्यात येणार आहे.
“सिंदेवाही पोलीस आपल्यासोबत, सुरक्षित उत्सवांसाठी सदैव तत्पर!” असा संदेश देत सिंदेवाही पोलीस प्रशासनाने तालुक्यातील सर्व सार्वजनिक गणेश मंडळांनी या उपक्रमात मोठ्या संख्येने सहभागी होऊन सहकार्य करण्याचे आवाहन केले आहे.
