परवानगी नसलेले १३० बॅनर्स हटविले ll एक खिडकी कक्षातर्फे ८९२ अर्ज मंजूर
चंद्रपूर ०८ जानेवारी – निवडणूक आचारसंहिता जाहीर होताच प्रत्येक उमेदवाराने त्याच्या प्रचार साहित्याची परवानगी मनपाकडुन घेणे बंधनकारक आहे. मात्र काही उमेदवार अथवा राजकीय पक्षांद्वारे रीतसर परवानगी न घेता परस्पर बॅनर ,पोस्टर्स, होर्डिंग लावण्यात आल्याचे निदर्शनास येत असल्याने, त्यावर कारवाई करून ३ जानेवारी पासुन सुमारे १३० कट-आऊट,बॅनर व १५० झेंडे काढण्यात आले आहे.
चंद्रपूर महानगरपालिका सार्वत्रिक निवडणूक २०२५-२६ साठी आचारसंहिता लागु झाल्यानंतर प्रचार कार्यालय,रॅली,मेळावा,मिरवणुक,रोड शो, बॅनर,कट आऊट,पोस्टर्स,जाहीर सभा,कॉर्नर सभा,प्रचार वाहन इत्यादी विविध परवानगीसाठी चंद्रपूर महानगरपालिका प्रशासनाद्वारे सुरु करण्यात आलेल्या एक खिडकी कक्षाद्वारे ७ जानेवारीपर्यंत प्राप्त ११०६ अर्जांपैकी ८९२ अर्ज मंजूर,२१ अर्ज नामंजूर तर १९३ अर्ज प्रलंबित आहेत
यापुढे जे उमेदवार अथवा राजकीय पक्ष रीतसर परवानगी न घेता परस्पर बॅनर ,पोस्टर्स, होर्डिंग लावतील अशा उमेदवाराकडून प्रत्येकी २ हजार रुपये दंड आकारण्यात येणार असल्याचे प्रशासनातर्फे स्पष्ट करण्यात आले आहे. तसेच निवडणूक आचारसंहितेबाबत कुठलीही तक्रार टोल फ्री १८००३०९७०४० व व्हॉट्सअँप क्रमांक ९०११०९५१६८ या दोन क्रमांकावर करता येणार आहे.
