चंद्रपूर पोलिसांची ऐतिहासिक कामगिरी; गोवंश तस्करांवर जिल्ह्यातील पहिली ‘मकोका’ अंतर्गत कारवाई!
६३ गोवंशाची क्रूरपणे अवैध वाहतूक करणारी संघटित ‘इम्रान कल्लु शेख’ टोळी जेरबंद; मुळसऱ्यात कारवाई
चंद्रपूर जिल्हा आणि परिसरात संघटितपणे अवैध गोवंश तस्करी करणाऱ्या गुन्हेगारी टोळ्यांचे कंबरडे मोडण्यासाठी चंद्रपूर पोलिसांनी आतापर्यंतचे सर्वात मोठे आणि ऐतिहासिक पाऊल उचलले आहे. जिल्ह्यातील कुख्यात गोवंश तस्कर इम्रान कल्लु शेख आणि त्याच्या टोळीविरुद्ध अत्यंत कडक मानला जाणारा ‘महाराष्ट्र संघटित गुन्हेगारी नियंत्रण कायदा १९९९’ (MCOCA – मकोका) अंतर्गत गुन्हा दाखल करण्यात आला आहे. गोवंश तस्करी करणाऱ्या टोळीवर मकोका लावण्याची चंद्रपूर जिल्ह्याच्या इतिहासातील ही पहिलीच वेळ आहे.
अशी झाली धाडसी पोलीस कारवाई
स्थानिक गुन्हे शाखेचे पथक रामनगर पोलीस स्टेशनच्या हद्दीत पेट्रोलिंग करत असताना, त्यांना गुप्त माहिती मिळाली की, मूल ते चंद्रपूर रोडवरून तेलंगणा राज्याकडे दोन मोठ्या ट्रकमध्ये अत्यंत क्रूरपणे जनावरांची अवैध वाहतूक केली जात आहे. पोलिसांनी तात्काळ सापळा रचून मुळसऱ्याजवळ टाटा कंपनीचे दोन संशयित ट्रक अडवून त्यांची तपासणी केली.
६३ गोवंशाची निर्दयतेने कोंबून वाहतूक; २ जनावरांचा मृत्यू
तपासणी दरम्यान पोलिसांना दोन्ही ट्रकमध्ये अत्यंत धक्कादायक आणि अंगावर काटा आणणारे दृश्य दिसून आले.
ट्रकमध्ये एकूण ६३ गोवंश (गायी-बैल) अत्यंत निर्दयतेने आणि दाटीवाटीने बांधले होते.
जनावरांचे हात, पाय आणि तोंड दोरीने घट्ट बांधण्यात आले होते.
वाहनांमध्ये क्षमतेपेक्षा जास्त जनावरे भरलेली असून, त्यांच्यासाठी चारा किंवा पाण्याची कोणतीही सोय नव्हती.
या क्रूरतेमुळे दोन जनावरांचा जागीच मृत्यू झाला होता, तर इतर जनावरे गंभीर जखमी अवस्थेत होती.
आरोपींकडे पशुवैद्यकीय विकास अधिकाऱ्यांचे वाहतूक प्रमाणपत्र किंवा आरटीओ (RTO) कडून वाहतूक करण्याचा कोणताही कायदेशीर परवाना नव्हता.
पोलिसांच्या प्राथमिक तपासणीत समोर आले आहे की, आरोपींनी संगनमत करून या गोवंशाची कत्तल करण्याच्या उद्देशाने महाराष्ट्रातून तेलंगणा राज्यात अवैध चोरी छुपे वाहतूक चालविली होती.
दाखल गुन्हे आणि कलमे
या प्रकरणी रामनगर पोलीस स्टेशनमध्ये विविध गंभीर कलमांनुसार गुन्हा नोंदवण्यात आला आहे:
प्राण्यांना क्रूरतेने वागवण्यास प्रतिबंध अधिनियम १९६०: कलम ११(१)(अ), (ड), (इ) आणि (ज)
महाराष्ट्र प्राणी संरक्षण अधिनियम १९७६ (सुधारित २०१५): कलम ५(अ), ५(ब), ९
भारतीय न्याय संहिता (BNS): कलम ३२५, ३(५), ६१
म्हणून लावला ‘मकोका’!
टोळीप्रमुख इम्रान कल्लु शेख व त्याचे साथीदार हे पोलीस अभिलेखातील सराईत गुन्हेगार आहेत. चंद्रपूर जिल्ह्यासह या टोळीविरुद्ध संघटितपणे अवैध गोवंश तस्करीचे एकापेक्षा जास्त गंभीर गुन्हे दाखल आहेत. ही टोळी संघटित गुन्हेगारी करत असल्याचे निष्पन्न झाल्यानंतर, चंद्रपूर पोलीस प्रशासनाने तात्काळ मकोका कायद्यान्वये प्रस्ताव तयार करून मा. विशेष पोलीस महानिरीक्षक, नागपूर परिक्षेत्र यांच्याकडे सादर केला होता. या ऐतिहासिक प्रस्तावाला मंजुरी मिळाल्यानंतर या गुन्ह्यात मकोकाचे कलम ३(१)(ii), ३(२), ३(४) चा समावेश करण्यात आला आहे.
कारवाई करणारे पोलीस पथक
सदर धडक कारवाई चंद्रपूर पोलीस अधीक्षक श्री. मुम्मका सुदर्शन, अप्पर पोलीस अधीक्षक श्री. रिना यादव आणि उपविभागीय पोलीस अधिकारी (चंद्रपूर) श्री. प्रमोद मकेश्वर यांच्या मार्गदर्शनाखाली करण्यात आली.
या कारवाईत खालील अधिकारी व अंमलदारांचा सहभाग होता:
पो.नि. श्री. महेश कोंडावार (स्थानिक गुन्हे शाखा, चंद्रपूर)
पो.नि. वाघमारे (रामनगर पोलीस स्टेशन)
पो.उपनि. सुधीर उंबरे (तपास अधिकारी, रामनगर पो.स्टे.)
स्थानिक गुन्हे शाखा व रामनगर पोलीस स्टेशनचे अंमलदार संजय जमीर, प्रकाश, सुधीर, सतीश, नरेश व गजानन.
पोलीस प्रशासनाचा कडक इशारा!
“चंद्रपूर जिल्ह्यात कोणत्याही प्रकारची अवैध गोवंश तस्करी किंवा संघटित गुन्हेगारी खपवून घेतली जाणार नाही. अशा गुन्हेगारांवर यापुढेही मकोका सारख्या अत्यंत कठोर कायद्यांतर्गत अशीच धडक मोहीम सुरू राहील.” – पोलीस प्रशासन, चंद्रपूर.
