मौजा वंडोली जंगल परिसरात पोलीस नक्षल चकमकीत झालेल्या मृत्यूच्या शोध मोहिमेबाबत
गडचिरोली,दि.23: सर्व जनतेला सुचित करण्यात येते की, पोलीस स्टेशन जारावंडी, उपविभाग पेंढरी अंतर्गत मौजा वंडोली जंगल परिसरात, दिनांक 17 जुलै 2024 रोजी झालेल्या पोलीस – नक्षल चकमकी दरम्यान सात पुरुष व पाच महिला मृतदेह सापडल्याचे नमूद आहे. सदर घटनेतील मृतपावलेल्या व्यक्तीचे/मृतदेहाचे मृत्युच्या कारणांचा शोध लावणे आवश्यक असल्याने सदर प्रकरणात भारतीय नागरीक सुरक्षा संहिता 2023 चे कलम 196 अन्वये दंडाधिकारी चौकशी करावयाची आहे.
तरी जाहिररित्या पुनश्च: सुचित करण्यात येते की, या घटनेची प्रत्यक्ष माहिती असणाऱ्या आणि चौकशीमध्ये भाग घेऊ इच्छिणाऱ्यांनी पुढील मुद्यांना अनुसरुन आपले लेखी निवेदन शपथपत्रासह उपविभागीय दंडाधिकारी, एटापल्ली यांचे समक्ष शपथेवर जाहीर सूचना प्रसिद्धी झाल्यापासून 21 दिवसाचे आत किंवा तत्पूर्वी कार्यालयीन वेळेत हजर न झाल्यास कोणाचेही काहीही आक्षेप नाही असे गृहीत धरुन प्रकरणात पुढील कार्यवाही करण्यात येईल. असे उपविभागीय दंडाधिकारी, एटापल्ली, नमन गोयल यांनी कळविले आहे.
चौकशीमध्ये भाग घेऊ इच्छिणाऱ्यांनी पुढील मुद्यांना अनुसरुन लेखी निवेदन द्यावे. आपण पाहिल्याप्रमाणे घटनेचे वर्णन, आपला या घटने विषयीचा अनुभव, घटनेनंतर किंवा आधी या घटनेशी काही घटना घडली असल्यास त्या विषयी माहिती सरकारी किंवा अन्य यंत्रणेच्या प्रतिक्रिया किंवा सहभाग यांच्या विषयी म्हणणे, या घटनेशी संबंधित इतर कोणतीही माहिती.
