प्रलंबित प्रकरणे मार्गी लावण्यासाठी पाठपुरावा करा
जिल्हा दक्षता समितीच्या बैठकीत जिल्हाधिकाऱ्यांचे निर्देश
भंडारा दि. 27: पोलीस तपासावर प्रलंबित असलेल्या प्रकरणांचा पाठपुरावा करून मार्गी लावा तसेच जिल्ह्यात न्यायव्यवस्था अबाधित ठेवण्यासाठी आवश्यक परीक्षण व अहवालांची पुर्तता करून घ्यावी, असे निर्देश जिल्हाधिकारी योगेश कुंभेजकर यांनी जिल्हा दक्षता व नियंत्रण समितीच्या सभेत भंडारा पोलिसांना दिले.
यावेळी समाज कल्याण विभागाचे सहायक आयुक्त तथा समितीचे सदस्य सचिव बाबासाहेब देशमुख, उपमुख्य कार्यकारी अधिकारी जि.प. मनिषा कुरसुंगे, पोलीस निरीक्षक चव्हाण, शासकीय अभियोक्ता जिल्हा न्यायालय ॲड. विनोद भोले आदी उपस्थित होते. या बैठकीत अनुसूचित जाती जमाती अत्याचार प्रतिबंधक अधिनियम आणि नागरी हक्क संरक्षण अधिनियमांतर्गत 31 डिसेंबर 2022 अखेर पोलीस तपासावर प्रलंबित प्रकरणांचा आढावा जिल्हाधिकाऱ्यांनी घेतला.
जिल्ह्यात 1989 पासून अनुसूचित जाती जमाती विरूध्द एकूण 1 हजार 75 प्रकरणे असून 812 गुन्ह्यांचा निकाल लागला आहे. त्यापैकी 35 प्रकरणांमध्ये दोषींना शिक्षा झाली असून 769 प्रकरणे दोषमुक्त असल्याचे न्यायालयाने ठरविले आहे. तसेच 8 प्रकरणात फिर्यादींनी प्रकरणे मागे घेतले आहे. सध्या पोलीस तपासावर 8 प्रकरणे प्रलंबित असल्याचे श्री. देशमुख यांनी समितीस सांगितले.
