मराठी सिनेमा सातासमुद्रापार! महाराष्ट्र शासन आणि अमेरिकेच्या ‘नाफा फिल्म फेस्टिव्हल’मध्ये ऐतिहासिक करार
मराठी चित्रपटसृष्टीच्या जागतिक विस्तारासाठी महाराष्ट्र शासनाने एक मोठे आणि ऐतिहासिक पाऊल उचलले आहे. शासनाच्या सांस्कृतिक कार्य विभागाच्या मार्गदर्शनाखाली ‘फिल्मसिटी’ आणि उत्तर अमेरिकेतील ‘नॉर्थ अमेरिकन फिल्म असोसिएशन’ (नाफा) यांच्यात नुकताच एक महत्त्वपूर्ण सामंजस्य करार करण्यात आला आहे.
या करारानुसार, अमेरिकेतील प्रतिष्ठित ‘नाफा आंतरराष्ट्रीय चित्रपट महोत्सव’ आता महाराष्ट्र शासनाच्या अधिकृत सहकार्याने आयोजित केला जाईल. पुणे आंतरराष्ट्रीय चित्रपट महोत्सव (PIFF) आणि मुंबईच्या (MIFF) धर्तीवर, भारताबाहेर आयोजित होणारा हा महाराष्ट्र शासनाचा पहिला अधिकृत संलग्न मराठी चित्रपट महोत्सव ठरणार आहे. या संदर्भातील शासन निर्णय (जी.आर.) नुकताच जारी करण्यात आला असून, महोत्सवासाठी शासन आणि फिल्मसिटीमार्फत आर्थिक सहाय्य दिले जाणार आहे.
राष्ट्रीय पुरस्कारप्राप्त चित्रपट निर्माते अभिजित घोलप यांच्या संकल्पनेतून सुरू झालेली ‘नाफा’ (NAFA) ही एक ना-नफा संस्था असून, गेल्या तीन वर्षांपासून ती उत्तर अमेरिकेत मराठी संस्कृतीला जागतिक व्यासपीठ मिळवून देत आहे.
मराठी चित्रपटसृष्टीला होणारे प्रमुख लाभ:
जागतिक बाजारपेठ: मराठी चित्रपटांना आंतरराष्ट्रीय वितरण, OTT व्यासपीठे आणि नव्या बाजारपेठा उपलब्ध होणार.
थेट संपर्क: जागतिक चित्रपट महोत्सवांचे वितरक आणि गुंतवणूकदारांशी थेट जोडले जाण्याची संधी.
अत्याधुनिक तंत्रज्ञान: नवोदित कलावंतांना आधुनिक चित्रपटनिर्मिती, कृत्रिम बुद्धिमत्ता (AI) आणि मार्केटिंगचा जागतिक अनुभव मिळणार.
सहनिर्मितीला चालना: आंतरराष्ट्रीय सहनिर्मिती (Co-production) आणि संयुक्त प्रकल्पांना गती मिळणार.
नेमके काय म्हणाले दिग्गज?
अॅड. आशिष शेलार (सांस्कृतिक कार्यमंत्री):
“राज्यातील कलाकार, तंत्रज्ञ आणि निर्मात्यांना आंतरराष्ट्रीय संधी देणे हे आमचे प्राधान्य आहे. ‘नाफा’सोबतचे हे सहकार्य महाराष्ट्राची समृद्ध संस्कृती जागतिक स्तरावर पोहोचवण्यासाठी मैलाचा दगड ठरेल.”
अभिजित घोलप (संस्थापक-अध्यक्ष, NAFA):
“महाराष्ट्र शासनाचा प्रतिसाद हा मराठी चित्रपटसृष्टीसाठी अभिमानास्पद क्षण आहे. यामुळे केवळ महोत्सवाचे आयोजन होणार नाही, तर मराठी चित्रपटांसाठी जागतिक व्यापार आणि गुंतवणुकीचे नवे दालन खुले होईल. मुख्यमंत्री मा. देवेंद्र फडणवीस आणि सांस्कृतिक कार्यमंत्री मा. आशिष शेलार यांच्या सहकार्याबद्दल मी ऋणी आहे.”
‘नाफा २०२६’ चे स्वरूप कसे असेल?
२०२६ च्या या महोत्सवामध्ये जगभरातील २० ते ३० देशांतील चित्रपट प्रदर्शित केले जाणार आहेत. तसेच चित्रपट निर्मिती, कृत्रिम बुद्धिमत्ता (AI) आणि अत्याधुनिक तंत्रज्ञानावर आधारित विविध कार्यशाळा व मास्टरक्लासचे आयोजन केले जाईल. या सोहळ्यासाठी महाराष्ट्रातील वरिष्ठ शासकीय अधिकारी आणि चित्रपट क्षेत्रातील मान्यवरांचे शिष्टमंडळ अमेरिकेला भेट देणार आहे.
