पाच महिन्यांची गरोदर गीतांजलीचा कानाच्या तीव्र वेदनांनी मृत्यू
सिंदेवाही तालुक्यातील गुंजेवाही येथील गीतांजली रुपेश येसमवार (वय २३) या पाच महिन्यांच्या गरोदर मातेला झालेल्या कानाच्या तीव्र वेदना आणि त्यानंतर वाढलेल्या सिकलसेलच्या त्रासामुळे उपचारादरम्यान मृत्यू झाल्याची हृदय पिळवटून टाकणारी घटना शनिवारी पहाटे घडली. माहितीनुसार, गीतांजली यांच्या कानात गेल्या काही दिवसांपासून सतत वेदना होत होत्या. यापूर्वी चंद्रपूर येथेही उपचार करण्यात आले होते. शनिवारी संध्याकाळी अचानक वेदना वाढल्याने तिला सिंदेवाही ग्रामीण रुग्णालयात नेण्यात आले. प्राथमिक उपचारांनंतर प्रकृती स्थिर दिसल्याने घरी नेण्यात आले. मात्र, मध्यरात्री पुन्हा वेदना तीव्र झाल्याने तिची तब्येत ढासळू लागली. त्यावेळी तिचे पती रुपेश येसमवार, आशा वर्कर मंगला मुतेलवार, तसेच कुटुंबीयांनी तिला तातडीने पुन्हा रुग्णालयात आणले. डॉक्टरांनी तपासणी केली असता गीतांजली आधीच मृत असल्याचे निदर्शनास आले.
यानंतर शवविच्छेदन करण्यात आले असून पुढील कार्यवाही सिंदेवाही पोलिसांकडून शासकीय नियमानुसार सुरू आहे.अचानक झालेल्या या मृत्यूने येसमवार कुटुंबावर शोककळा पसरली असून संपूर्ण गुंजेवाही गाव हळहळ व्यक्त करीत आहे.
