जिल्हा नियंत्रण कक्षातून मतदानाचे सूक्ष्म नियंत्रण
भंडारा दि.20 :महाराष्ट्र विधानसभेसाठी आज जिल्ह्यामध्ये मतदान झाले या मतदानामध्ये मतदारांनी मोठ्या प्रमाणात उत्साह दाखवत सायंकाळी साडेपाच वाजेपर्यंत 65.88% मतदानाची टक्केवारी नोंदवली.
भंडारा जिल्ह्यामध्ये मोठ्या प्रमाणावर सकाळी सात वाजता पासून मतदानाची प्रक्रिया सुरू झाली. या प्रक्रियेमध्ये दिव्यांग, मतदार, तृतीयपंथी मतदार तसेच महिला गृहिणी ,जेष्ठ नागरिक यांनी उत्साहाने सहभाग घेतला.
समाज माध्यमांवर मोठ्या प्रमाणावर मतदान केल्यानंतर सेल्फी पोस्ट करून अन्य मतदारांनाही प्रोत्साहन करण्यात येत होते.
मात्र विधानसभा क्षेत्र निहाय ही निवडणूक होत असली तरीही जिल्हा नियंत्रण कक्षातून या मतदान कार्याशी संबंधित सर्व बाबींचे अहवाल सादरीकरण जिल्हा नियंत्रण कक्षातून करण्यात येत होते. जिल्हा नियंत्रण कक्षाचे काम सकाळी सहा वाजता सुरू झाले. या नियंत्रण कक्षामध्ये वेब कास्टिंग कॅमेऱ्यांचे नियंत्रण तसेच ईव्हीएम मशीन वाहतूक नियंत्रण, वाहनाची जीपिएस तपासणी, यासह मतदानाची दर दोन तासांनी येणारी आकडेवारी, तसेच विविध अहवाल निवडणूक क्षेत्र स्तरावरून येत होते. या नियंत्रण कक्षाला सामान्य निरीक्षक श्री. गुप्ता यांनी भेट देवून पाहणी केली. जिल्हाधिकारी संजय कोलते, उपजिल्हाधिकारी लीना फलके यांच्यासह, माध्यमिक शिक्षणाधिकारी रवींद्र सलामे, प्राथमिक शिक्षणाधिकारी श्री. सोनटक्के, जिल्हा माहिती अधिकारी शैलजा वाघ उपस्थित होते.
