मतदान संपण्याच्या 48 तास अगोदर कोरडा दिवस जाहीर
भंडारा दि. 15 :भंडारा-गोंदिया लोकसभा मतदान संघामध्ये दिनांक 19 एप्रिल 2024 रोजी निवडणुक घेण्यात येणार आहे. तसेच 4 जून 2024 रोजी मतमोजणी होणार आहे. ही निवडणुक खुल्या, मुक्त व निर्भय वातावरणात पार पाडण्यासाठी दिनांक 17 एप्रिल 2024 रोजी सायंकाळी 6 वाजतापासून ते 19 एप्रिल 2024 पर्यंत पुर्ण दिवस व 4 जून 2024 रोजी मतमोजणीच्या दिवशी पुर्ण दिवस भंडारा जिल्ह्यातील ठोक व किरकोळ देशी/विदेशी मद्यविक्री करण्यास मनाई/कोरडा दिवस ठेवण्याचे आदेश जिल्हाधिकारी योगेश कुंभेजकर यांनी जारी केले आहे.
सदर निवडणूक मतदान प्रक्रिया संपण्याच्या वेळेपूर्वीच्या 48 तासांमध्ये मद्यविक्री करण्यास मनाई/ कोरडा दिवसा जाहीर करण्याबाबत लोकप्रतिनिधीत्व अधिनियम, 1951 च्या कलम 135 (सी) अन्वये तरतूद करण्यात आली आहे. भंडारा जिल्ह्यातील ठोक व किरकोळ देशी / विदेशी मद्यविक्री अनुज्ञप्त्या 17 एप्रिल 2024 ला सायंकाळी 6 वाजता पासून पुढे, मतदानाच्या पूर्वीचा दिवस 18 एप्रिल आणि 19 एप्रिल मतदानाचा पूर्ण बंद तसेच 4 जून मतमोजणीच्या दिवशी मद्यविक्री/कोरडा दिवस पाळण्याचे आदेश देण्यात आले आहेत. या आदेशाचे उल्लंघन करून मद्यविक्री करताना आढळून आल्यास संबंधितावर कठोर कारवाई करण्यात येईल, असा इशारा जिल्हाधिकारी मा. योगेश कुंभेजकर यांनी दिले आहे.
