पशु गणनेसाठी पशुसंवर्धन विभाग सज्ज
भंडारा, दि.25 : दि.२५ नोव्हेंबर, २०२४ पासून सुरु होणाऱ्या पशू गणनेसाठी जिल्ह्यातील पशुसंवर्धन विभाग सज्ज असल्याची माहिती जिल्हा पशुसंवर्धन उपायुक्त डॉ.अन्नू वरारकर, जिल्हा पशुसंवर्धन उपआयुक्त, भंडारा यांनी दिली. २१ व्या पशुगणनेस दि.२५ नोव्हेंबर, २०२४ ला प्रारंभ होणार असून दि.२८ फेब्रुवारी,२०२५ पर्यंत ही मोहीम राबविण्यात येईल. ग्रामीण भागासाठी दर तीन हजार कुटुंबामागे एक प्रगणक तर शहरी भागासाठी चार हजार कुटुंबामागे एक प्रगणक नियुक्ती करण्यात आले आहे.
जिल्हयातील पशुवैद्यकीय दवाखान्याच्या कार्यक्षेत्रात किती पशुधन आहे. त्यानुसार लसीकरण, औषधांचा पुरवठा केला जातो. त्यामुळे आपल्याकडील जनावरांची खरी माहिती पशुपालकांनी प्रगणक यांना द्यावी, असे आवाहन डॉ. अन्नू वरारकर,जिल्हा पशुसंवर्धन उपआयुक्त, यांनी केले आहे. २१ व्या पंचवार्षिक पशुगणने करिता एकूण ९३ प्रगणक व १८ पर्यवेक्षकांची या कामासाठी नेमणूक करण्यात आली आहे. पशुसंवर्धन विभागाकडून दर पाच वर्षांनी पशुगणना केली जाते. जनगणनेच्या धर्तीवरच ही मोहीम राबवली जाते. यंदाची पशुगणना २५ नोव्हेंबर, २०२४ पासून सुरु होणार आहे. त्या अनुषंगाने पशुसंवर्धन विभागाकडून तयारी केली जात आहे.
पशुगणनेसाठी प्रगणकाची नेमणूक केलीली असून प्रगणक व पर्यवेक्षकांना प्रशिक्षण देण्यात आलेले आहे. जिल्ह्यात ग्रामीण भागात ८६४ गावांसाठी ८१ प्रगणक व १६ पर्यवेक्षक असून, शहरी भागासाठी १२ प्रगणक व ०२ पर्यवेक्षक असे एकूण ९३ प्रगणक व १८ पर्यवेक्षक नेमण्यात आले आहेत. २१ व्या पशुगणने अंतर्गत पशुगणना करणेकरिता पशुधन पर्यवेक्षक पदविका अभ्यासक्रम पूर्ण केलेल्यांची या कामासाठी नियुक्ती केली आहे. पशुगणना मोहिमेत गायवर्ग, म्हैस वर्ग, शेळी-मेंढी, अश्व, वराह, कुक्कुटपक्षी, पशुपालनात वापरली जाणारी यंत्रसामग्री यांची गणना केली जाणार आहे. या पशुगणनेच्या आधारावर शासनाकडून विविध धोरण व योजना आखल्या जातात व त्यानुसार निधीची उपलब्धता केली जाते. याकरिता केंद्र शासनाकडून software विकसित केलेले असून केंद्रीय पशुसंवर्धन विभागाच्या software मध्ये हि माहिती भरायची आहे.असे जिल्हा पशुसंवर्धन उपायुक्त डॉ.अन्नू वरारकर यांनी कळविले आहे.
