आदिम जमातीच्या विकासाकरीता शेळीगट वाटप योजना, औषधी वनस्पती लागवड व फलोद्यान, कृषी व पशुपालन प्रशिक्षण योजना
चंद्रपूर दि. 6 सप्टेंबर : एकात्मिक आदिवासी विकास प्रकल्प, केंद्रीय क्षेत्र योजनेअंतर्गत आदिम जमातीच्या विकासाकरीता शेळी गट वाटप योजना (10 शेळ्या व 1 बोकड), औषधी वनस्पतीची लागवड व फलोद्यान, कृषी व पशुपालन प्रशिक्षण योजना राबविण्यात येत आहे. प्रकल्पांतर्गत चंद्रपूर, बल्लारपूर, राजुरा, जिवती, कोरपना, पोभुंर्णा, गोंडपिपरी, मूल, सिंदेवाही, सावली या तालुक्यातील अधिवास असलेल्या कोलाम जमातीच्या लाभार्थ्यांकडून सदर योजनांकरिता अर्ज मागविण्यात येत आहे.
योजनेचा लाभ घेण्यास इच्छुक असलेल्या व अटीची पूर्तता करणाऱ्या आदिम जमातीच्या लाभार्थ्यांनी परिपुर्ण कागदपत्रासह आपले अर्ज एकात्मिक आदिवासी विकास प्रकल्प कार्यालय, चंद्रपूर येथे सादर करावे. योजनेचे अर्ज प्रकल्प कार्यालय चंद्रपूर, शासकीय आश्रमशाळा, अनुदानित आश्रमशाळा, शासकीय मुला-मुलींचे वसतिगृह येथे 20 सप्टेंबर 2021 या कालावधीत नि:शुल्क उपलब्ध आहे.
शेळी गट वाटप योजना:
दुर्गम भागातील आदिम जमातीचे कुटुंब शेतमजूर, भूमिहीन असावे, वार्षिक उत्पन्न 20 हजाराच्या आत असल्यास प्राधान्य देण्यात येईल, लाभार्थी कुटुंबाकडे किमान 300 चौ.मी स्वतःची जागा असावी, तसेच यापूर्वी लाभार्थी कुटुंबाने अन्य कोणत्याही योजनेअंतर्गंत दुधाळ जनावर, शेळी गट पुरवठा योजनेचा लाभ घेतलेला नसावा.
औषधी वनस्पतीची लागवड व फलोद्यान योजना:
लाभार्थी हा आदिम जमातीच्या असावा, लाभार्थ्यांकडे रोपवाटिकेसाठी स्वतःची जागा असावी. मुख्यत: आदिम जमातीच्या पारंपारिक वैदुंना प्राधान्य देण्यात येईल, तसेच निवड झालेल्या लाभार्थ्यांस 2 दिवसाचे प्रशिक्षण घेणे अनिवार्य राहील.
कृषी व पशुपालन प्रशिक्षण योजना:
सदर योजनेमध्ये प्रशिक्षणार्थी लाभार्थी हा आदिम जमातीचा शेतकरी असावा. निवड झालेल्या प्रशिक्षणार्थीना संपूर्ण प्रशिक्षणाचे टप्पे पूर्ण करणे बंधनकारक राहील तसेच प्रशिक्षणार्थींना प्रशिक्षण करण्याची आवड व शेती करण्याची रुची असावी.
सदर योजनेच्या लाभासाठी ईच्छुक पात्र लाभार्थ्यांनी परीपुर्ण कागदपत्रांसह अर्ज एकात्मिक आदिवासी विकास प्रकल्प कार्यालय,चंद्रपूर येथे सादर करावे. असे सहाय्यक जिल्हाधिकारी तथा प्रकल्प अधिकारी रोहन घुगे यांनी कळविले आहे.
