प्रधानमंत्री पीक विमा योजनेत सहभाग घ्या – हिंदुराव चव्हाण
भंडारा,दि.14:- प्रधानमंत्री पीक विमा योजना (खरीप) सन 2021-22 राबविण्यास शासनाकडून मंजुरी प्राप्त झालेली आहे. भंडारा जिल्ह्याकरिता या योजनेअंतर्गत भात व सोयाबिन ही दोन अधिसूचित पिके आहेत. नुकसान भरपाई निश्चित करण्यासाठी अधिसूचित विमा क्षेत्र घटक ग्राह्य धरण्यात येईल. योजनेत शेतकऱ्यांनी सहभाग घ्यावा असे आवाहन जिल्हा अधिक्षक कृषी अधिकारी हिंदुराव चव्हाण यांनी केले आहे.
या योजनेअंतर्गत प्रतिकुल नैसर्गिक परिस्थितीमुळे होणारे पिकांचे नुकसान जसे हवामान घटकांच्या प्रतिकूल परिस्थितीमुळे पिकांची पेरणी किंवा लावणी न झाल्यामुळे होणारे नुकसान, पीक पेरणीपासून काढणीपर्यंतच्या कालावधीत नैसर्गिक आग, वीज कोसळणे, गारपीट, वादळ, चक्रीवादळ, पुर, क्षेत्र जलमय होणे, भुस्खलन, दुष्काळ, पावसातील खंड ई. बाबीमुळे उत्पादनात येणारी घट ई. बाबीकरिता नुकसान भरपाई देण्यात येते.
सदर योजना कर्जदार व बिगर कर्जदार अशा दोन्ही प्रकारच्या शेतकऱ्यांसाठी ऐच्छिक आहे. बिगरकर्जदार शेतकऱ्यांना योजनेमध्ये समाविष्ट होण्याकरीता ऑनलाईन पध्दतीने अर्ज करावयाचा आहे. सदर अर्ज बँक, कृषी पतपुरवठा सहकारी संस्था, प्रादेशिक ग्रामीण बँक, आपले सरकार सेवा केंद्र किंवा विमा कंपनीचे अ‍धिकृत विमा प्रतिनिधी यांचेमार्फत विमा हप्ता भरावयाचा आहे. बिगरकर्जदारासाठी अर्जाची अंतिम मुदत 15 जुलै 2021 आहे.
प्रधानमंत्री पीक विमा योजना (खरीप) सन 2021-22 अंतर्गत धान व सोयाबिन दोन्ही पिकांसाठी जोखिमस्तर 70 टक्के निश्चित करण्यात आलेला आहे. पिक विमा योजनेअंतर्गत अर्ज करावयाचा अंतिम दिनांक 15 जुलै 2021 आहे. भंडारा जिल्ह्याकरीता एचडीएफसी इर्गो इन्सुरंस क.लि. मुंबई ही इन्सुरंस कंपनी निश्चित झालेली आहे. पीक विमा योजनेअंतर्गत धान पीक (खरीप हंगाम) करिता शेतकऱ्यांनी भरावयाची विमा हप्त्याची रक्कम रु.760/- प्रति हेक्टर असुन विमा संरक्षित रक्कम रु. 38000 प्रति हे. आहे. तसेच सोयाबिन पीक (खरीप हंगाम) करिता विमा हप्त्याची रक्कम रु. 550 प्रति हेक्टर असुन विमा संरक्षित रक्कम रु. 27500 प्रति हे. आहे.
प्रधानमंत्री पीक विमा योजनेत अधिसूचित क्षेत्र, पिके, विमा हप्ता व योजनेच्या ईतर तपशिलाकरिता क्रॉप इंशुरन्स हे मोबाईल अॅप शेतकऱ्यांकरिता मराठी भाषेमध्ये विकसित करण्यात आलेले आहे. या अॅप च्या माध्यमातुन योजनेबाबत माहिती वेळोवळी शेतकऱ्यांना पाहता येईल. तरी, प्रधानमंत्री पीक विमा योजना (खरीप) सन 2021-22 योजनेमध्ये सहभाग घेण्यासाठी खूप कमी कालावधी उरला असून त्याचा लाभ जास्तीत जास्त शेतकऱ्यांनी घेण्याबाबत, जिल्हा अधिक्षक कृषी अधिकारी भंडारा हिंदुराव चव्हाण यांनी आवाहन केले आहे.
