1 ऑगस्ट रोजी राष्ट्रीय लोक अदालतीचे आयोजन
Ø झटपट निर्णय प्राप्त करण्याची पक्षकारांना सुवर्णसंधी
चंद्रपूर दि. 29 जून: राष्ट्रीय विधी सेवा प्राधिकरण, नवी दिल्ली आणि महाराष्ट्र राज्य विधी सेवा प्राधिकरण, मुंबई यांच्या सुचनेनुसार चंद्रपूर, जिल्हा विधी सेवा प्राधिकरणातर्फे 1 ऑगस्ट 2021 रोजी जिल्ह्यात राष्ट्रीय लोक अदालतीचे आयोजन करण्यात आले आहे. या राष्ट्रीय लोक अदालतीच्या माध्यमातून न्यायालयात प्रलंबित प्रकरणांमध्ये त्वरीत न्याय मिळण्याची संधी पक्षकारांना उपलब्ध झाली आहे. त्यामुळे जिल्हयातील विधीज्ञ, पक्षकार व नागरीकांनी लोक अदालतीत उत्स्फुर्तपणे सहभागी होऊन सुवर्णसंधीचा लाभ घ्यावा, असे आवाहन प्रमुख जिल्हा व सत्र न्यायाधीश तथा जिल्हा विधीसेवा प्राधिकरणाच्या अध्यक्षा कविता अग्रवाल यांनी केले आहे.
झटपट निकाल हे लोक न्यायालयाचे वैशिष्टय आहे. लोक न्यायालयाचा महत्त्वाचा फायदा म्हणजे यामध्ये प्रलंबित न्यायालयीन प्रकरणांचा आपसी समझोत्याने व सर्वसंमतीने त्वरित निकाल दिला जातो. तसेच त्या आदेशाला दिवाणी न्यायालयाच्या हुकूमनामा एवढेच महत्व असते व त्याची अंमलबजावणीसुध्दा करता येते. त्यामुळे वेळ, पैसा, श्रमाची बचत होते. वादांचा समोपचाराने कायमचा निपटारा होतो, सर्वच पक्षांना जिंकल्याचे समाधान मिळत असल्याने भविष्यकालीन वाद टाळले जातात. कार्यवाहीसाठी वेगळा शुल्क, खर्च लागत नाही.
चालु वर्षी ही राष्ट्रीय लोक अदालत प्रथमच आयोजित होत आहे. त्यात सहभागी होउन आपले प्रकरण विहित सोप्या प्रक्रियेव्दारे निकाली करून घेत वरील नमुद फायदे मिळवण्याची संधी पक्षकारांना मोफत उपलब्ध झालेली आहे.
चंद्रपूर जिल्हा मुख्यालयासह जिल्ह्यातील सर्व तालुकास्तरीय न्यायालयांमध्ये एकाच दिवशी घेण्यात येत असलेल्या या लोकअदालतीमध्ये न्यायालयातील दिवाणी, फौजदारी, कलम 138 एन.आय.अॅक्ट (धनादेश न वटणे), बॅकांची कर्ज वसूली वगैरे प्रकरणे, मोटार वाहन अपघात नुकसान भरपाई प्रकरणे, जमीन अधिग्रहण अर्ज, कामगार कायद्याखालील प्रकरणे, घरमालक-भाडेकरू वाद, कौटुंबिक वाद, इलेक्ट्रीसिटी अॅक्टचे समझोतायोग्य वाद तसेच न्यायालयात येण्याअगोदरची (प्रिलिटीगेशन) प्रकरणे, महसुल, पाणीपट्टी, वीजबिल आपसी समझोत्याकरीता ठेवून ती सामंजस्याने येणार आहे.
अधिक माहितीसाठी तसेच ज्या नागरिकांना आपली प्रकरणे सदर लोक अदालतीमध्ये ठेवायची असल्यास संबंधित न्यायालयात किंवा जिल्हा विधी सेवा प्राधिकरण, चंद्रपूर येथे प्रत्यक्षपणे संपर्क साधावा. तसेच 07172-271679 या हेल्पलाईन क्रमांकावर किंवा कार्यालयातील कनिष्ठ लिपीक श्री. भटारकर, 9765628961, श्री.सोनकुसरे 9325318616 आणि श्री. साखरे मो. नं. 8999954259 या क्रमांकावर संपर्क साधावा, असे चंद्रपूर जिल्हा विधी सेवा प्राधिकरणाचे अधिक्षक, यांनी कळविले आहे.
