मुख्यमंत्री देवेंद्र फडणवीस यांच्या अंधत्व मुक्त महाराष्ट्र संकल्पनेतून १० कोटींचे CSR प्रकल्प मंजूर
Ø नेत्र शस्त्रक्रिया शिबिरे, आरोग्य उपकरणे खरेदी सारख्या आरोग्यविषयक उपक्रमांना चालना
मुंबई, दि. १० – महाराष्ट्रात कॉर्पोरेट सामाजिक उत्तरदायित्व (CSR) निधीच्या माध्यमातून आरोग्यविषयक उपक्रमांना मोठा हातभार लागला असून मुख्यमंत्री देवेंद्र फडणवीस यांच्या पुढाकाराने आणि अंधत्व मुक्त महाराष्ट्र या संकल्पनेतून तब्बल ₹९९३.९७ लाख (सुमारे १० कोटी रुपये) किमतीचे प्रकल्प मंजूर झाले आहेत. हे प्रकल्प प्रामुख्याने आरोग्यसेवा, जनजागृती आणि गरजू रुग्णांसाठी वैद्यकीय सहाय्य वाढविण्यावर केंद्रित आहेत. मुख्यमंत्री फडणवीस यांच्या अंधत्व मुक्त महाराष्ट्र या उद्देशाने आणि ध्येयाने केलेल्या आवाहनाला प्रतिसाद देत या सामाजिक दायित्व निधीतून विविध उपक्रम राबवण्यात येत आहेत.
मंजूर प्रकल्प पुढीलप्रमाणे आहेत.
इंदिरा गांधी वैद्यकीय महाविद्यालय व रुग्णालय, नागपूर यांच्या सहकार्याने नागपूर जिल्ह्यात डोळ्यांचे शिबिरे व ५,००० मोतीबिंदू शस्त्रक्रिया यासाठी २५०.५४ लाख रुपयांचा निधी खर्च करण्यात येत आहे. या माध्यमातून ग्रामीण व दुर्बल घटकांतील नागरिकांना मोफत नेत्र तपासणी व मोतीबिंदू शस्त्रक्रियांची सुविधा उपलब्ध करून देण्यात येत आहे. तसेच नागपूर आणि अमरावती विभागातील १० शासकीय रुग्णालयांमध्ये नेत्र तपासणी शिबिर व १० हजार मोतीबिंदू शस्त्रक्रिया करण्यात येत आहेत. यासाठी ३६४.८५ लाख इतके अनुदान देण्यात आले आहे. विदर्भातील ग्रामीण भागात नेत्र आरोग्य सेवा बळकट करणे आणि मोठ्या प्रमाणात मोफत शस्त्रक्रिया उपलब्ध करून देणे. हा याचा उद्देश आहे.
अत्याधुनिक वैद्यकीय उपकरणे उपलब्ध करून रुग्णसेवा अधिक प्रभावी बनवणे या उद्देशाने इंदिरा गांधी वैद्यकीय महाविद्यालय व रुग्णालय, नागपूर यांच्या माध्यमातून भूलतज्ज्ञ, नेत्रविज्ञान व रेडिओलॉजी विभागासाठी वैद्यकीय उपकरणांची खरेदीसाठी ३२८.५८ लाख रुपयांचे अनुदान देण्यात आले. या प्रकल्पांसाठी एकूण ९९३.९७ लाख निधी मंजूर करण्यात आला आहे. तसेच मुख्यमंत्री फडणवीस यांच्या पुढाकाराने पुढील प्रस्ताव राबवण्यात येणार आहेत. कोळसा क्षेत्रातील कंपन्यांमार्फत मुख्यमंत्री सहायता निधी (CMRF) तसेच राज्यातील विविध रुग्णालयांशी CSR सहकार्य स्थापून गरजू रुग्णांना वैद्यकीय मदत पुरविणे.
या सर्व प्रकल्पांमुळे विदर्भातील आरोग्यसेवा सुधारते आहे. मोफत नेत्रशिबिरे व शस्त्रक्रियांमुळे हजारो रुग्णांना दृष्टिदान मिळते आहे. वैद्यकीय उपकरणांमुळे नागपूरमधील सार्वजनिक रुग्णालयांची सेवा गुणवत्ता वाढेते आहे.
या उपक्रमांद्वारे महाराष्ट्रात CSR निधीचा वापर प्रभावीपणे आरोग्य क्षेत्रातील मूलभूत गरजा पूर्ण करण्यासाठी होत आहे, हे स्पष्ट होत असून, मुख्यमंत्री देवेंद्र फडणवीस यांच्या मार्गदर्शनाखाली सामाजिक उत्तरदायित्व आणि लोककल्याण यांचे संगम साधणारे हे प्रकल्प राज्याच्या आरोग्य व्यवस्थेला बळकटी देणार आहेत.
