आंतरराष्ट्रीय योग दिनानिमित्त चंद्रपूर महानगरपालिकेत योगसत्राचे आयोजन
चंद्रपूर, दि. २१ जून :
आंतरराष्ट्रीय योग दिनाचे औचित्य साधून चंद्रपूर शहर महानगरपालिकेच्या वतीने आज सकाळी ७ वाजता विशेष योग सत्राचे आयोजन करण्यात आले. या कार्यक्रमाला शहरातील नागरिक, विद्यार्थी, महानगरपालिकेचे अधिकारी, कर्मचारी तसेच ज्येष्ठ नागरिक यांनी उत्स्फूर्त प्रतिसाद दिला.
कार्यक्रमाची सुरुवात राष्ट्रगीताने झाली. त्यानंतर महानगरपालिकेचे आयुक्त यांनी उपस्थितांना संबोधित करत योगाचे शारीरिक, मानसिक आणि आध्यात्मिक जीवनातील महत्व विशद केले. त्यांनी आपल्या भाषणात म्हटले की, “योग ही भारताची प्राचीन परंपरा असून आजच्या तणावपूर्ण जीवनशैलीमध्ये योग हे आरोग्य टिकवण्यासाठी व मनःशांतीसाठी अत्यंत उपयुक्त साधन आहे. प्रत्येकाने दररोजच्या दिनचर्येत योगाचा समावेश करणे गरजेचे आहे.”
पतंजली योग समिती द्वारे प्रशिक्षित योग शिक्षकांच्या मार्गदर्शनाखाली विविध योगासने, प्राणायाम व ध्यानसाधना करण्यात आली. यावेळी अनेकांनी पहिल्यांदाच सामूहिक योगासने करून आनंद व्यक्त केला.
कार्यक्रमाच्या समाप्तीप्रसंगी सर्व सहभागी नागरिकांनी नियमित योगाभ्यास करण्याची प्रतिज्ञा केली. कार्यक्रम यशस्वी करण्यासाठी महानगरपालिकेच्या आरोग्य विभाग तसेच विविध विभागांचे सहकार्य लाभले.
